 |
E-Mail vom 27.03.2007 vo dä Mimä
hoi zeme!
uf... ziit rennt schnell... has sgfühl ich han mich doch erst grad no gmeldet und uf die ander site isch so wahnsinig viel passiert, dass ich gar nid weiss wo afange.
Öpis was mir immer meh bewust isch das mir mensche eifach mensche sind und bliebed egal wo uf dere welt. jede hets gfühl, dass er me problem und ärmer dran isch als sin nachber und uf die ander art het glich jede wieder s’gfühl öpis bessers zsie als de ander. egal wie gross problem sind oder was für problem, de einzig weg isch vo sich eweg zluege und uf gott und sini mitmensche zluege. ich bin sicher du wirsch öper finde wo dini hilf sehr gern animmt. nechste liebi isch mir letzt wuche bi zweine usem team ufgfalle. mir gebet was mir vorig hend...sie aber gebed obwohls zwenig hend und teilet. sie gebed vom beste au wens nachher hungrig heigönd.
bi mi mir isch en altag usbroche und jede morge muen ich wieder neu motivation sueche für en lange astrengende heisse kliniktag. doch meistens wenn de tag is rolle chunt und me ame chranke chan es lache is gsicht zaubere gseht de tag ganz anders us. am morge bevor mir dklinik startet reded mir immer zu de lüt. mir versuched ihne chli öpis vo de medizinische sicht wiitergeh (en ma het mich gfroget wieso sini körpertemperatur 35.6 tüffer isch als die vo sinere frau 35.8, debie seg er doch meh krank als dfrau....do gseht me die egoistisch site vom ma..hihi...und vorallem das kei ahnig hend was wie vorgaht im körper) und zum teil verzehled mir e gschicht us de bible.
letzt
wuche hend mir ame morge es lied mitenand gsunge. es isch en mega friede umegsie. am schluss isch e frau ufgstande und het es zügnis geh das sie 4 kind verlohre het und alles versucht het... doch nüt het ghulfe...jesus seg de einzig wo chön hoffnig geh!
i de letzte wuche hemmer einigi brocheni arm gseh... dkind gönd uf dbäum go chlini früchtlis abehole und gheiet hüfig abe. mir hends in nechst grössere spital gschickt aber jetzt usegfunde das det kei material hend zum irgendöpis zmache.... aso sind mir fast zwunge spestmögliche z’versuche das es irgendwie chli grad zemewachst.
aber
vielmol isches so broche, dass wens nid würkli operiert und richtig zeme do wird, nie meh wüerkli chönd bruche.
denn isch e frau cho wo wortwörtlich am verrotte isch wege aids...
sie isch no 34kg schwer...meh gseht sozege es knochegrüst vor dir....
bi de liste sind dlympfdrüese so am verrotte gege use, dass me uf beidne site e eitrigi stell gseht.wie furchtbar muess so en tot sie.
wo mir am letzte samstig nach binga (grösseri stadt) gfahre sind für es pastoremeeting hend mir ufem weg en bueb mitgnoh wo vome krokodil bisse worde isch.... genau bim oberkörper... skrokodil het under beidne arm zuebisse....mir hend gar nüt versuecht a ihm z’
mache
sondern sind direkt in spital gfahre wos ihn den in nechst grössere spital (sehr wiit weg...) brocht hend.
mir gönd jede monet ein samstig uf binga mit 10 pastore im auto....
das git immer ei riese diskusion und jede versucht möglichst lut sini meinig zvertrette. ich bin mega froh han ich min sitz vorne im auto und chan kei tonga :) den sind mir ca vor eim monet zrug i dhaupstadt harare gfahre für meh medikament und z’esse und benzin. es isch e gueti ziit gsie.
alles isch eifach anders als in europa und me muess en weg finde wie meh zu dem chunt wo me wot.... aber es klappet schlussentlich glich!
mir sind den no zum OM hauptort gange für zwei teg. det hends verschiedeni projekt am laufe. eis isch so öpis ähnlichs wie kindergarte. es sind ca 50 3-5jahrigi chind det und 3 lehrerine wo die schar versucht zunterhalte. wo ich szweite mol bin go zueluege het eini gfunde... ich söll doch es spiel ihne bibringe und het mir grad dleitig für die ganz gruppe geh.... uf... bin froh gsie woni nach ca. einere stund wieder han chöne goh! :) au schuscht wirds mir do nie langwillig. irgendöpis chan me immer mache. ich vermisse aber glich seinte und sandere und freu mi au scho wieder zum eu all zgseh... aber ich bin die verbliebend (viel zschnell rasendi) ziit am gnüsse.
wünsche eu alles gueti und bis gli!
mime |
 |
